Kancelari austriak sot viziton Kosovën

Kancelari i Austrisë, Karl Nehammer, do të vizitojë sot Kosovën.

Nehammer pritet të takohet me udhëheqësit e Kosovës.

Vizita e Kancelarit austriak në Kosovë është pjesë e vizitës së tij në tre vendet e Ballkanit Perëndimor, Serbi, Bosnjë e Hercegovinë, dhe sot në Kosovë.

Një ditë më parë, në vizitën e tij në Serbi, Nehammer ka thënë se është e rëndësishme që BE-ja të përkufizohet qartë ndaj vendeve të Ballkanit Perëndimor dhe të nënvizojë se ato i përkasin Bashkimit Evropian, si dhe të përshpejtojë anëtarësimin euroatlantik të tyre.

“Si Bashkim Evropian, ne duhet të bëjmë gjithçka që procesi i anëtarësimit (të Ballkanit Perëndimor) të përshpejtohet. Austria e sheh veten si një urë në këtë proces dhe është shumë e rëndësishme për ne që procesi të përshpejtohet”, tha Nehammer në Serbi.

Ai deklaroi se marrëdhëniet me Serbinë janë “me rëndësi të madhe” për Austrinë dhe se Serbia është “një partner i rëndësishëm gjeostrategjik dhe politik për Austrinë, dhe rrjedhimisht edhe për BE-në”.

“Për Austrinë është e rëndësishme që ne të punojmë së bashku, sepse jemi të prekur njëlloj nga fenomeni i krimit të organizuar ose ai i migrimit ilegal. Është detyrim dhe interes i një shteti anëtar të BE-së që të japë një sinjal të qartë se duhet të punojmë së bashku për gjetjen e zgjidhjeve të problemeve”, shtoi kancelari austriak.

Nehammer theksoi gjithashtu “shqetësimin e madh” për ndikimin e madh të Rusisë në Ballkanin Perëndimor dhe “interesin e madh të Kinës për të pozicionuar veten” në rajon.

LEXONI GJITHASHTU: 

• Bashkimi Evropian dyfishon forcat ushtarake në Bosnjë