Kandidati në Vlorë, Nika: Vlora foli me politikë, votuesi sabotoi zgjedhjet

Gjergj Nika, kandidati i pavarur në Vlorë, i dalë nga radhët e këshilltarëve demokratë të bashkisë, ka folur për mikrofonin e Euronews Albania në emisionin Review me moderatoren Greta Topjana.

Nika ka thënë se e ka parashikuar këtë pjesëmarrje të ulët, sipas tij, në zgjedhjet e pjesshme në Vlorë. Ai ka denoncuar, sipas tij, patronazhimin e votuesve që ka ndodhur nëpërmjet punësimit.

“Kemi gjithë ditën që denoncojmë patronazhimin nëpërmjet punësimit, ku shohim që administrata ka qenë e frustruar gjatë gjithë kësaj periudhe dyjavore që kanë qenë zgjedhjet. Unë e kam parashikuar që pjesëmarrja nuk do të jetë më shumë se 15 përqind, dhe sot populli i Vlorës ka sabotuar politikën. Vlora ka prodhuar politikë, sepse kandidati që do të dalë fitues, që pritet të dalë, është ai i PS. Pas presioneve nëpërmjet administratës, po e them që qyteti i Vlorës, kryetarja e re e bashkisë do të jetë e mandatuar me 70 përqind të votave të qytetarëve të Vlorës. Ka dështuar e gjithë kasta politike e 11 majit. Vlora ka 6 deputetë të PS që janë nga qyteti i Vlorës, dhe të 6 këta nuk prodhuan dot një mandat, duke parë që kandidati i PS do të marrë 10 ose 11 mijë vota.” – tha Nika.