Kaos në aeroportet evropiane, grevat për rritjen e pagave shkaktojnë vonesa

Pakënaqësia sociale ka marrë dhënë mes punonjësve të aeroporteve dhe linjave ajrore evropiane.

Fluturime të anuluara, vonesa dhe kaosi kanë përfshirë aeroporte të ndryshme franceze për shkak të grevave për pagat përballë inflacionit në rritje dhe rikuperimit të vështirë pas viteve të pandemisë. Punonjësit thonë se situata është e papranueshme.

“Aktivitetet e aeroportit kanë arritur në 95% të nivelit të para pandemisë, me përjashtim të faktit se kemi 20 mijë punonjës më pak dhe kur kushtet e punës janë përkeqësuar”, u shpreh Nicolas Pereira, përfaqësues sindikate.

“Jemi në një situatë ku nuk menaxhojmë dot pasagjerët, ku kolegët nuk mund të bëjnë një pauzë, gjë që duket e pabesueshme në aeroportin e Parisit. Ky është motivi i kaosit”, tha   Fabrice Criquet, përfaqësues sindikate.

Protesta përputhet me mbërritjen e sezonit veror dhe fillimin e turizmit. Disa pasagjerë nuk e fshehin zhgënjimin.

“Me COVID-in që po rikthehet nuk ndihemi mirë. Situata për njerëzit që kanë një avion për të kapur dhe që prej muajsh kanë bërë të gjitha organizimet situata nuk është e mirë. Duket sikur po mbahemi peng”, u shpreh një grua.

Situata është e njëjtë edhe për punonjësit e linjave ajrore me kosto të ulët në Spanjë, të cilët po kërkojnë paga të barabarta me ato të kolegëve evropianë.

Por edhe kolegët e tyre evropianë nuk janë shumë të kënaqur me situatën. Sikurse në Francë, sindikatat në Gjermani po kërkojnë rritje rroge dhe staf për t’u përballur me valën e fluturimeve si pasojë e sezonit veror.

Vonesat janë të vazhdueshme dhe disa pasagjerë kanë mbërritur një ditë para për t’u siguruar që të mos humbin fluturimin.

LEXONI GHITHASHTU:

• Biden: Mbështetje ndaj grave që ndryshojnë shtet për të kryer abordin
• Biden: Lufta në Ukrainë ka dëmtuar Rusinë