Kapen në makinë me doza kanabisi gati për shitje, arrestohen dy të rinj në Korçë

Policia e Korçës ka arrestuar dy të rinj në këtë qytet, pasi gjatë kontrollit në makinën me të cilën po lëviznin, u gjetën doza kanabisi që dyshohet se ishin të destinuara për t’u shitur.

Sipas policisë, në pranga kanë rënë 30-vjeçari E.P. dhe 25-vjeçari S.M., të cilët akuzohen për veprat penale “Prodhimi dhe shitja e narkotikëve”, “Prodhimi dhe mbajtja pa leje e armëve të gjuetisë dhe sportive” si dhe “Kalimi i paligjshëm i kufirit shtetëror”.

“Në momentin e ndalimit, gjatë kontrollit fizik ndaj shtetasve E.P. dhe S.M., si dhe gjatë kontrollit në automjet, shërbimet e Policisë gjetën dhe sekuestruan një sasi lënde të dyshuar narkotike kanabis, të ndarë në doza, gati për shitje. Në vijim të veprimeve, gjatë kontrollit në banesën e shtetasit E.P., u gjetën dhe u sekuestruan një sasi tjetër kanabisi, një shumë parash e dyshuar e përfituar nga kjo veprimtari kriminale, si dhe një sasi fishekësh për armë gjahu”, thuhet në njoftimin e policisë.

Në bashkëpunim me Prokurorinë vijon puna për identifikimin dhe arrestimin e shtetasve të tjerë që mund të jenë të përfshirë në këtë veprimtari kriminale.