Kapet 15 600 euro në kufi, merret në hetim 38-vjeçari nga Kosova

Një shqiptar i Kosovës është marrë ne hetim pasi u kap në pikën kufitare të Morinës me një shumë të konsiderueshme parash të padeklaruar.

Policia Kufitare bëri të ditur se gjatë një kontrolli fizik në hyrje të territorit të Republikës së Shqipërisë, i janë gjetur 15 600 euro shtetasit M. B., 38 vjeç, banues në Gjilan, të cilat nuk ishin deklaruar në përputhje me legjislacionin në fuqi.

Shuma u sekuestrua në cilësinë e provës materiale, ndërsa ndaj tij ka nisur procedimi penal në gjendje të lirë për veprën penale “Mosdeklarimi në kufi i të hollave dhe i sendeve me vlerë”.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës, e cila po ndjek çështjen për veprime të mëtejshme ligjore.