Autoritetet policore amerikane njoftuan arrestimin e një 26-vjeçari të pajisur me armë, i dyshuar për vrasjen e drejtorit ekzekutiv të një kompanie sigurimesh, që tronditi Nju Jorkun.

Brian Thompson, drejtues i kompanisë së sigurimeve “United Healthcare”, mbeti i vrarë të mërkurën e kaluar teksa po shkonte në konferencën vjetore të grupit.

Kryedetektivi i Departamentit të Policisë së Nju Jorkut, Joseph Kenny deklaroi se i dyshuari Luigi Mangione ndodhet tashmë në arrest.

Ai ra në pranga pasi policia mori një informacion se 26-vjeçari ishte parë në një restorant “McDonald’s” në Pensilvani.

Autoritetet rikuperuan një dokument të shkruar që tregonte për motivimin dhe gjendjen mendore të të dyshuarit. Ato deklaruan se dokumenti tregonte “vullnetin e sëmurë të të riut kundrejt korporatave”.

Arrestimi i dha fund një fushate kërkimi të shtrirë në mbarë Shtetet e Bashkuara.