KAS rrëzon ankimimin e PD-së për koalicionin Shtëpia e Lirisë

Komisioni i Ankimimeve dhe Sanksioneve rrëzoi kërkesën e PD-së për të mos regjistruar  koalicionin ‘Shtëpia e Lirisë’ në zgjedhjet e pjesshme lokale të 6 marsit.  Ky vendim u mor në mbledhjen e sotme, e cila zhvillua me dyer të mbyllura.

Të shtunën, PD ankimoi vendimin e Komisionerit të Zgjedhjeve, Ilirjan Celibashi për regjistrimin e koalicionit “Shtëpia e Lirisë” për zgjedhjet e 6 marsit.

PD nënvizon se ka qenë jo e ligjshme kërkesa e depozituar në KQZ, nga LSI për regjistrimin e koalicionit, pasi Komisioni i Rithemelimit dhe PDK nuk janë regjistruar si parti për zgjedhjet e pjesshme vendore. Sipas PD Komisioni i Rithemelimit nuk ekziston e regjistruar as si parti politike.

Të premten, KQZ vendosi që Komisioni i Rithemelimit të mbetet jashtë koalicionit ‘Shtëpia e Lirisë’. Sipas KQZ, emri i Komisionit të Rithemelimit të Partisë Demokratike nuk do të shënohet në fletën e votimit dhe në asnjë dokument.