Katica Janeva para infarkti, dërgohet me urgjencë në spital

Ish prokurorja Speciale e Maqedonisë së Veriut Katica Janeva është dërguar me urgjencë në spital privat për sëmundjet e zemrës. Informacionin për Euronews Shqipëri e konfirmoi drejtori i burgut të Shkupit Esad Rahiq, i cili nuk kishte mundësi të komunikojë informacionin para kamerës, shkaku se kishte shkuar për pushime fundjave.

Rahiq, i tha gazetarit të Euronews Shqipëri se Katica Janeva ishte ankuar në dhimbje dhe me kërkesë të familjes së saj është dërguar në spital priva. Spitali ka konstatuar se ajo duhet të shtrihet aty pasi që ka patur simptome para infarkti.

“Është dërguar në spital për kontroll. Spitali Filipi i Dytë e ka ndalur për shkak të problemeve me zemrën”, na informoi shkurtimisht Esad Rahiq, drejtor i burgut hetues të Shutkës.

Rahiq na njoftoi edhe se Katica Janeva para se të sëmurej, qëndronte në pjesën standarde të burgut, e jo në pjesën e quajtur si “Reparti i Hagës” që është më i rregulluar në krahasim me pjesën tjetër të burgut. Janeva fillimisht për shkaqe sigurie ishte vendosur në pjesën e Hagës, ndërsa më pas është vendosur sikurse të gjithë të burgosurat e tjera në qeli me femra të tjera.