‘Keni gënjyer me shifrat’, Basha debaton me Manastirliun për vdekjet gjatë pandemisë

Kryedemokrati Lulzim Basha ka debatuar sot në Kuvend me ministren e Shëndetësisë, Ogerta Manastirliu për shifrat e vdekjeve gjatë pandemisë.

Ishte kryedemokrati, ai i cili akuzoi qeverinë që ka gënjyer me shifrat e viktimave.

“Qytetarët tashmë e dinë që kanë gënjyer për ndihmën ekonomike, që kanë gënjyer për rimbursimin e të prekurve nga Covid-19, që kanë gënjyer për tenderët abuzivë në kohë pandemie, por mbi të gjitha, që kanë gënjyer për numrin e jetëve të humbura”, u shpreh Basha.

Kreu i PD-së shtoi se këtë e konfirmon tashmë edhe raporti i Komisionit Europian, në të cilin njoftohet se Shqipëria ka shtesën më të lartë të vdekjeve në Europë për vitin 2020.

Për këtë pati edhe një replikë nga ministrja e Shëndetësisë, Manastirliu, e cila u shpre se  se të gjitha deklaratat e Bashës janë akuza shterpë.

“E keni kthyer vdekjen në rrefren. Keni kohë tashmë, 18 muaj që hiqni vallen e vdekjes. Nuk e kuptoj pse këmbëngulmi me kaq kënaqësi në retorikën e vdekjes. Akuzat shterpë nuk mund të jenë fakte, ashtu sikurse shifrat nuk mund të jenë opinione”, u shpreh znj. Manastirliu.

Më pas kryedemokrati Basha i kërkoi kryetares së Kuvendit, Lindita Nikolla, që të zbatojë rregulloren duke i dhënë mundësi opozitës të replikojë.

“Zonja Nikolla, unë e kuptoj që je mësuar të marrësh komanda dhe urdhra me buton, por kjo nuk është Asambleja e Partisë Socialiste, as mbledhja e oligarkëve, as ndonjë azil numër 2 ku mund të bësh gjërat siç do ti, e siç ke dashur ti. Ky është kuvendi, i dal nga masakra zgjedhore, por ka disa rregulla”, u shpreh Basha.

LEXONI GJITHASHTU:

• Manastirliu: 500 mijë doza ‘Pfizer’ vijnë brenda 3 muajsh, përshpejtojmë planin e vaksinimit
• Gledis Nano merr zyrtarisht detyrën me premtimin për reformim të mëtejshëm të Policisë së Shtetit