Kërcënoi me armë efektivin e policisë, arrestohet 26-vjeçari në Elbasan

Policia e Elbasanit ka arrestuar një 26-vjeçar që lëvizte i armatosur dhe kërcënoi me armë efektin e policisë i cili tentoi ta ndalonte. Në pranga u vu shtetasi R. B., 26 vjeç, banues në Elbasan.

Ky shtetas sipas policisë, qarkullonte i armatosur me pistoletë, në mesnatë, në lagjen “Luigj Gurakuqi”, kur është konstatuar nga një punonjës policie që ishte jashtë orarit të shërbimit.

Në momentin e konstatimit, shtetasi i armatosur ka kanosur punonjësin e Policisë, për ta vrarë.

Falë veprimeve profesionale të punonjësit të Policisë dhe mbërritjes në kohë të  Patrullës së Përgjithshme dhe Forcës së Posaçme “Shqiponja”, që ishin në patrullim në qytet, të cilat ishin njoftuar nga punonjësi i Policisë, është neutralizuar dhe arrestuar 26-vjeçari.

Në cilësinë e provës materiale u sekuestrua arma e zjarrit pistoletë me municion luftarak.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprat penale “Kanosja për shkak të detyrës“ dhe “Mbajtja pa leje dhe prodhimi i armëve, armëve shpërthyese dhe municionit luftarak”.

LEXONI GJITHASHTU:

• Aksident në aksin Elbasan-Peqin, furgoni përplaset me makinën dhe bie në lumë
• Aksident me vdekje në aksin Plepa-Kavajë, makina përplas këmbësorin dhe largohet