Kërcënoi në emision se do vriste Kurtin, arrestohet nga policia e Kosovës rapsodi

Policia e Kosovës ka arrestuar këtë të enjte shtetasin Nuredin Gashi, një rapsod nga Drenica, pasi ka kërcënuar me jetë kryeministrin Albin Kurti. Në njoftimin e bërë publik nga ana e autoriteteve të Kosovës thuhet se personi i ndaluar e ka kërcënuar fillimisht kryeministrin përmes një postimi në rrjetin social facebook. Më pas Gashi i ka vazhduar kërcënimet dhe në një transmetim të drejtpërdrejtë në emisionin “DEBAT PLUS’’ më 30 gusht.

Ai është ndaluar për 48 orëme vendim të Prokurorisë Speciale.

“Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar sot të dyshuarin me inicialet N.S. për shkak të dyshimit të arsyeshëm se ka kryer veprën penale ‘’Dhuna ndaj përfaqësuesve të lartë të Republikës së Kosovës’’ nga neni 121 të KPRK-së.

Prokuroria Speciale njofton se i dyshuari N.S. ka bërë kanosje të dhunës për vrasje ndaj Kryeministrit të Republikës së Kosovës, pasi që ka bërë një postim në rrjetin social “Facebook’’ me përmbajtje inkriminuese, si dhe, gjatë transmetimit të drejtpërdrejtë të emisionit “DEBAT PLUS’’,  të datës 30 gusht 2023, të njëjtën deklaratë i njëjti e përsëritë”, njofton policia e Kosovës.

Madje në youtube ekziton dhe një këngë me çifteli e rapsodit nga Drenica, e publikuar tre vite më parë, ku sërish ai kërcënon Albin Kurtin.

Në mbishkrimin e videos Gashi shkruan se: “Kush tradhëton atdheun e vetë e pret pushka me fishekë”.