Kërkesa e PD për anulimin e koncesionit për Butrintin, Kushtetuesja shtyn seancën

Gjykata Kushtetuese ka shtyrë seancën për padinë e bërë nga deputetja e PD, Ina Zhupa, për shfuqizimin e vendimit që jep me koncesion Parkun e Butrintit.

Shtyrja u bë me argumentin se 36 deputetët firmëtarë, si palë në këtë çështje, nuk kanë autorizimin për t’i përfaqësuar.

Deputetja e Partisë Demokratike Ina Zhupa kërkoi që seanca të zhvillohet në 11 korrik, kërkesë që u pranua nga kryetarja Holta Zaçaj. Kjo e fundit theksoi se për shqyrtimin e çështjes nevojiten 28 firma.

Padia në fjalë është ngritur kundër koncesionit të Butrintit dhe është firmosur nga 36 deputetë. Sipas deputetëve të Partisë Demokratike, kontrata koncesionare për menaxhimin e parkut arkeologjik të Butrintit ka një sërë shkeljesh ligjore.

Në padi, PD i kërkon Gjykatës Kushtetuese shfuqizimin e ligjit për koncesionin e Butrintit dhe pezullimin e menjëhershëm të këtij ligji, për shkak se krijon dëme të cilat do të ishin të pariparueshme.

Gjatë muajve tetor dhe nëntor marrëveshja për menaxhimin e Parkut Kombëtar të Butrintit nga fondacioni shqiptaro-amerikan AADF dhe shteti shqiptar ishte në qendër të debateve mes opozitës dhe mazhorancës.

Ligji u miratua vetëm me votat e mazhorancës dhe 18 deputetët e opozitës në seancë votuan kundër.

LEXONI GJITHASHTU:

• Studioja e arkitektit japonez shpallet fituese për projektin e Parkut të Butrintit
• Kushtetuesja pranon padinë e PD për Butrintin