Kina dhe India neutrale ndaj Rusisë

Rusia përdori të drejtën e vetos për të bllokuar një rezolutë të Këshillit të Sigurimit që “dënon” pushtimin rus në Ukrainë.

Vetoja e Moskës ishte e pritshme, por Kina dhe India abstenuan.

Teksti i rezolutës kërkonte tërheqjen e trupave ruse nga Ukraina. Edhe Shqipëria kishte kërkuar që kjo rezolutë të votohej.

“Të mos harrojmë kurrë se kjo është një luftë e zgjedhur. Zgjedhja e Rusisë. Rusia zgjodhi të pushtojë fqinjin e saj”, thotë Linda Thomas-Greenfield, Ambasadore e SHBA.

Sekretari i Përgjithshëm i OKB-së dënoi agresionin e Rusisë duke bërë thirrje për dialog

“Kombet e Bashkuara lindën nga lufta për t’i dhënë fund luftës. Sot, ai objektiv nuk u arrit. Por ne nuk duhet të dorëzohemi kurrë. Ne duhet t’i japim paqes një shans tjetër. Ushtarët duhet të kthehen në bazat  e tyre. Udhëheqësit duhet t’i kthehen rrugës se dialogut dhe paqes”, tha Antonio Guterres.

Shumica e anëtarëve të Këshillit të Sigurimit të OKB-së mbanin flamurin ukrainas përballë pikturës së Pikasos e konsideruar një nga veprat më të fuqishme kundër luftës në histori.