Kina dhe Serbia zotohen për “miqësi të çeliktë”

Rojat ushtarake u rreshtuan të mërkurën në Beograd për të pritur presidentin kinez Xi Jinping, i cili arriti të martën në mbrëmje në Serbi, për të diskutuar investimet prej disa miliardë eurosh në vendin ballkanik, i cili synon integrimet evropiane por ruan lidhje të ngushta me Rusinë dhe Pekinin.

Avionët e prodhimit rus Mig-29 shoqëruan avionin e presidentit kinez derisa po arrinte në Beograd të martën, shkruan VOA.

“Ne po shkruajmë historinë sot”, tha presidenti serb Aleksandër Vuçiç para një turme të mbledhur para pallatit presidencial serb të mërkurën.

Të dy udhëheqësit mburren me një “partneritet të hekurt” midis vendeve të tyre. Së bashku me Hungarinë, e cila është ndalesa e radhës e presidentit Xi, Serbia është mbështetësja më e fortë në Evropë e projektit të madh infrastrukturor të Kinës të njohur si “Breza dhe Rrugë”, nëpër pjesë të Azisë dhe Evropës.

Presidenti Xi tha se ishte i prekur nga pritja e ngrohtë dhe shfaqi besimin se vizita e tij do të “hapë një kapitull të ri” në marrëdhëniet midis dy vendeve.

“Serbia është bërë partneri i parë strategjik i Kinës në Evropën Qendrore dhe Lindore”, tha presidenti Xi, duke iu referuar një marrëveshjeje të vitit 2016 për një partneritet strategjik midis dy vendeve.

Presidenti Vuçiç tha se Serbia e konsideron ishullin e Tajvanit, që Pekini e sheh si një provincë e shkëputur, si pjesë të Kinës, ashtu siç Kina e konsideron Kosovën, e cila shpalli pavarësinë në vitin 2008, si pjesë të Serbisë.

Vëzhguesit thonë se vizitat në Serbi dhe Hungari, janë pjesë e përpjekjeve të presidenti Xi për t’u afruar me dy vende evropiane që janë pro Rusisë dhe përfituese të mëdha të investimeve kineze.

Gjatë vizitës së presidentit Xi në Francë, presidenti Emmanuel Macron dhe shefja e Komisionit Evropian Ursula von der Leyen i kërkuan udhëheqësit kinez të sigurojë tregti më të balancuar me Evropën dhe të përdorë ndikimin e tij në Rusi për t’i dhënë fund luftës në Ukrainë, por pa rezultat, sipas analistëve.

LEXONI GJITHASHTU:

• Sky News: Kina ka hakuar Ministrinë e Mbrojtjes të Mbretërisë së Bashkuar
• Përse presidenti kinez ndalet në Serbi? Eksperti zbërthen mesazhet