Kina “hakmerret” ndaj BE-së, vendos taksë mbi importet e rakisë evropiane

Kina ka njoftuar vendosjen e taksave mbi importet e rakisë evropiane, një lëvizje që Franca e konsideron hakmarrje për tarifat e larta që Bashkimi Evropian njoftoi për automjetet elektrike kineze.

Komisioni Evropian ka bërë të ditur se do të sfidojë këtë masë në Organizatën Botërore të Tregtisë (OBT), duke e quajtur atë një “abuzim” të masave të mbrojtjes tregtare.

Ministria e Tregtisë e Kinës ka theksuar se taksat janë një masë për të mbrojtur prodhuesit vendas, duke përmendur se importet e rakisë përbëjnë një kërcënim të rëndësishëm për industrinë kineze.

Prodhuesit francezë të rakisë, përfshirë markat e njohura si Hennessy dhe Remy Martin, kanë paralajmëruar se këto masa do të kenë pasoja katastrofike për industrinë.

Pas njoftimit, aksionet e kompanive të rakisë ranë ndjeshëm; LVMH, prodhuesi i Hennessy, ra më shumë se 3%, ndërsa Remy Cointreau, që prodhon Remy Martin, ra me më shumë se 8%.

Analistët vlerësojnë se tarifat e reja mund të rrisin çmimin e rakisë me 20%, duke ndikuar negativisht në shitjet dhe vëllimet e furnizuesve.

Franca, e cila përbën 99% të rakisë së eksportuar në Kinë, ka bërë thirrje për veprime në OBT, me Ministren e Tregtisë, Sophie Primas, që e quajti këtë masë një “kontradiktë totale” të rregullave të tregtisë ndërkombëtare.

Ajo theksoi se Franca do të punojë me Bashkimin Evropian për të kundërshtuar këtë veprim të Kinës, duke theksuar se industria e rakisë ka nevojë për mbështetje të menjëhershme.