Kina paralajmëron SHBA-në dhe Japoninë: Mos krijoni armiq imagjinarë

Pekini ka paralajmëruar të hënën Shtetet e Bashkuara dhe Japoninë “të mos krijojnë armiq imagjinarë”, pasi shtetet kanë kritikuar veprimet e Kinës në Detin e Kinës Jugore.

“Ne u bëjmë thirrje Shteteve të Bashkuara dhe Japonisë që të mos ndërhyjnë në punët e brendshme të Kinës dhe të mos krijojnë armiq imagjinarë”, ka thënë zëdhënësi i Ministrisë së Jashtme të Kinës, Lin Jian.

Pas bisedimeve të mbajtura të dielën në kryeqytetin japonez, SHBA-ja dhe vende tjera kanë kritikuar “veprimet destabilizuese” të Pekinit në Detin e Kinës Jugore, derisa kanë dënuar edhe rritjen e bashkëpunimit të Rusisë me Kinën dhe Korenë e Veriut.

Sekretari amerikan i Shtetit, Antony Blinken, Sekretari amerikan i Mbrojtjes, Lloyd Austin dhe disa homologë japonezë, kanë ripërsëritur kundërshtimet e tyre ndaj pretendimeve të paligjshme të Kinës në det.

Veç kësaj në deklaratën e përbashkët është folur edhe për veprimet provokative e kërcënuese në Detin e Kinës Jugore.

Autoritetet kineze kanë thënë të hënën se në deklaratën e përbashkët është përzier e mira me të keqen dhe sulmohet politika e Jashtme kineze.

Lin ka thënë se Kina hedh poshtë të gjitha pretendimet e bëra në deklaratë.

LEXONI GJITHASHTU:

• Kina fiton medaljen e parë të arit për qitje në Lojërat Olimpike
• Kina dhe Rusia me stërvitje të përbashkëta detare