Kolumbia ndalon eksportin e qymyrit, Petro: Izraeli e përdor për të vrarë fëmijët

Presidenti kolumbian, Gustavo Petro njoftoi të dielën se vendi i tij “zyrtarisht” po ndalon eksportet e qymyrit në Izrael, duke përmendur përdorimin e qymyrit kolumbian në armët e përdorura kundër palestinezëve në Gaza.

“Qymyri kolumbian përdoret për të bërë bomba për të vrarë fëmijët palestinezë,” tha Petro në X, duke justifikuar vendimin në përgjigje të sulmeve të vazhdueshme të Izraelit në Gaza.

Dekreti i firmosur nga Presidenti Petro së bashku me ministrat e Punëve të Jashtme, Financave, Minierave dhe Tregtisë, do të hyjë në fuqi pesë ditë pas botimit në Fletoren Zyrtare.

Kolumbia, e cila eksporton 5% të prodhimit të saj total të qymyrit në Izrael, ka pezulluar gjithashtu marrëdhëniet diplomatike me vendin, siç u njoftua në maj, për shkak të sulmit të Izraelit në Gaza.