Komandant Remi: Shtetet armike mos të bëjnë më insinuata në dëm të Kosovës

Rrustem Mustafa, ish-komandanti i UÇK-së ka folur në Euronews Albania lidhur me protestën e mbajtur ditën e sotme në Tiranë në mbështetje të ish-krerëve të UÇK-së të cilët po gjykohen në Hagë.

Mustafa vë në dukje të mos ketë insinuata në dëm të Kosovës nga shtetet armike.

“Nuk kam si mos të kem mall për bashkëluftëtarët e mi që janë në Hagë dhe plot bashkëluftarë të mi që nuk u kthyen më, nuk janë mes nesh. Është përgjegjësi që sot e tutje si të sillemi dhe si të udhëtojmë brenda zhvillimeve kombëtarë për të ecur më tutje. Do dëshiroja që pasojat që janë prodhuar më shumë se dy dekada për Ushtrinë Çlirimtare të Kosovës, të mos prodhohen më. Të mos prodhohen më për shkronjat e arta të UÇK-së.

Kemi marrë botën e qytetëruar në krah dhe kërkuar të drejtat tona për liri dhe pavarësi. Mos të lejojmë më që shteti armik dhe përtej tij, të prodhojë më insinuata që dëmtojnë misionin tonë, Ushtrinë Çlirimtare të Kosovës”, tha Rrustem Mustafa.