Kombëtarja vijon përgatitjet për Gjibraltarin, Simoni zëvendëson Kastratin e dëmtuar

Kombëtarja shqiptare ka vijuar përgatitjet për ndeshjet e shtatorit, ndërsa ndodhet në ditën e dytë të kampit stërvitor në Malaga, Spanjë.

Departamenti i Komunikimit në FSHF bën me dije se trajneri Silvinjo ka vendosur të ftojë portierin e Kombëtares U-21, Simon Simoni, për shkak se Elhan Kastrati nuk do të jetë i gatshëm për arsye dëmtimi.

Kastrati, i cili vuan nga një dëmtim në gju, është paraqitur në grumbullim ku i janë bërë analizat dhe vizitat mjekësore, që kanë konkluduar se ai nuk mund të luajë në ndeshjet ndaj Gjibraltarit dhe Letonisë dhe ka nevojë për trajtim.

Simoni pritet të mbërrijë në kampin kuqezi në orët në vazhdim dhe do të jetë në dispozicion të trajnerit për miqësoren ndaj Gjibraltarit dhe sfidën e kualifikueseve të Botërorit 2026 kundër Letonisë në Tiranë.

Në grup kanë mbërritur gjatë ditës edhe Enis Çokaj dhe Cristian Shpendi, të cilët janë stërvitur normalisht me skuadrën.

Seanca e stërvitjes ka zgjatur pak më shumë se një orë dhe i gjithë grupi raportohet në formë të mirë.

Ditën e mërkurë, në orën 17:00, do të zhvillohet konferenca zyrtare e trajnerit Silvinjo, ndërsa ora 18:00 është caktuar për seancën stërvitore zyrtare.

Shqipëria do të luajë më 4 shtator një miqësore në transfertë ndaj Gjibraltarit, me fillim në orën 18:00.

Më 9 shtator, në stadiumin “Air Albania” në Tiranë, do të zhvillohet ndeshja e kualifikueseve të Botërorit 2026 kundër Letonisë, që nis në orën 20:45.

Biletat për këtë sfidë mund të blihen online në wakwebleta.al, si dhe në biletarinë fizike në hyrjen kryesore të stadiumit “Air Albania”.

LEXONI GJITHASHTU:

• Bajrami nuk është i vetmi, cilët janë shqiptarët që kanë refuzuar kombëtaren
• Ndryshon lista e kombëtares: Mbrojtësi shqiptar braktis kuqezinjtë, zgjedh Zvicrën