Komisioni Xhafaj nis diskutimet për ndryshimet në Reformën në Drejtësi

Komisioni për Nismat Qytetare, Bashkëpunimin dhe Mbikëqyrjen Institucionale ka hapur këtë të martë debatet për ndryshime të dy ligjeve të reformës në drejtësi, pa pjesëmarrjen e deputetëve të opozitës. Qëllimi i këtyre amendamenteve është adresimi i problematikave të evidentuara nga organet e drejtësisë dhe forcimi i strukturës së reformës.

Ndryshimet e propozuara parashikojnë që studentët e Shkollës së Magjistraturës të përfshihen në procesin e vetingut, përmes një investigimi të thelluar të pasurisë. Një tjetër amendament ka të bëjë me vendimet e Këshillit të Lartë të Prokurorisë dhe Këshillit të Lartë Gjyqësor, të cilat do të jenë anonime, por të qarta për median dhe publikun një kërkesë kjo e Unionit të Gjyqtarëve.

“Back log emergjente. Unioni i Gjyqtarëve propozon shtyrjen e moshës së pensionit për gjyqtarët”, tha Olsi Komici, duke theksuar nevojën për diskutim të mëtejshëm.

Kryetari i komisionit, Fatmir Xhafaj, e cilësoi këtë propozim si “gjë e mirëpritur për tu diskutuar”.

Ndryshimet e prezantuara synojnë gjithashtu forcimin e mekanizmave të llogaridhënies, meritokracisë dhe transparencës për stafin akademik të Shkollës së Magjistraturës. Në fokus janë edhe përmirësimet e sistemit të konkurrimit dhe formimit fillestar për këshilltarët dhe ndihmësit ligjor në gjykata dhe prokurori.