Komisionieri Brunner në Tiranë! Takime me Ramën, ministren Koçiu, kreun e SPAK dhe ambasadorët e BE

Komisioneri Europian për Çështjet e Brendshme dhe Migracionin, Magnus Brunner këtë të premte ndodhet në Tiranë për një vizitë zyrtare. Brunner gjatë vizitës së tij ka zhvilluar disa takime ndër të cilat  me kreun e qeverisë, ministren e Brendshme, Albana Koçiu, ambasadorët e BE në Tiranë dhe drejtuesin e SPAK, Klodian Braho.

Në njoftimin e  shpërndarë për mediat para vizitës në Tiranë, Komisoni i BE njoftoi se takimet kanë për qëllim shkëmbimin e pikëpamjeve mbi bashkëpunimin në menaxhimin e migracionit, sigurinë kufitare dhe luftën kundër krimit të organizuar, si dhe mbi progresin e Shqipërisë në përafrimin me standardet e BE-së.

Për takimin me SPAK, në njoftimin e KE thuhet se komisioneri “do të njihet me punën e Strukturës së Posaçme kundër Korrupsionit dhe Krimit të Organizuar (SPAK), ndërsa do të përmbyllë qëndrimin e tij me një takim me rojet kufitare të Frontex-it dhe vëzhgimin e bashkëpunimit operacional në Portin e Durrësit”.