Komuniteti Politik Evropian mblidhet në Hungari, çështjet që do të diskutohen

Liderët evropianë janë mbledhur këtë të enjte në Budapest, Hungari, për samitin e pestë të Komunitetit Politik Evropian (EPC), një platformë që u themelua në vitin 2022 për të forcuar bashkëpunimin ndërmjet vendeve evropiane në trajtimin e çështjeve kryesore globale. Samiti pritet të fokusohet në disa tema të rëndësishme, përfshirë situatën në Ukrainë, tensionet në Lindjen e Mesme dhe sfidat që lidhen me sigurinë ekonomike dhe migracionin e parregullt në Evropë.

Kryeministri hungarez, Viktor Orban, mikpritës i takimit, priti zyrtarët nga vendet anëtare të BE-së dhe shtete të tjera të kontinentit për të diskutuar çështje që prekin drejtpërdrejt sigurinë dhe stabilitetin evropian. Po ashtu, një nga temat kryesore pritet të jetë bashkëpunimi BE-SHBA, pas rizgjedhjes së Donald Trump për një mandat të dytë presidencial në SHBA, e cila ka ngritur pikëpyetje mbi drejtimin e politikave transatlantike.

Pas përfundimit të samitit, kryeministri Orban dhe homologu i tij shqiptar, Edi Rama, do të mbajnë një konferencë për shtyp për të ndarë rezultatet dhe vendimet e marra gjatë diskutimeve, si dhe për të theksuar angazhimin për një Evropë më të sigurt dhe të bashkuar përballë sfidave aktuale.

LEXONI GJITHASHTU

• Rama flet nga Hungaria për rizgjedhjen e Trump: Mund jetë një gjë e mirë për Europën
• Rama takim me Erdogan dhe Mitsotakis, çfarë diskutuan 3 liderët