Rama flet nga Hungaria për rizgjedhjen e Trump: Mund jetë një gjë e mirë për Europën

Kryeministri Edi Rama ka komentuar nga Hungaria, gjatë Samitit të Komunitetit Politik Evropian, rizgjedhjen e Donald Trump në Shtetet e Bashkuara.

Gjatë një prononcimi të shkurtër për gazetarët, Rama tha se Evropa dhe bota nuk duhet të tregohen histerike për rikthimin e Trump. Ai theksoi se, ndryshe nga pritshmëritë, NATO u bë më e fortë gjatë mandatit të parë të presidencës së Donald Trump.

“Kur u zgjodh herën e parë, të gjithë po dridheshin, sepse ndoshta NATO do të përfundonte, por NATO u bë më e fortë. Mos bëhemi histerikë para se të shohim realitetin dhe çfarë do të ndodhë”, tha Rama.

Kryeministri shtoi se zgjedhjet në SHBA mund të shërbejnë si mundësi për Evropën për të riformuar shumë gjëra. Ai theksoi se kjo mund të jetë një mundësi për ta parë botën ndryshe dhe për të ndryshuar Evropën.

“Besoj se ajo që është thënë dhe diskutuar përpara zgjedhjeve evropiane ka shkuar shumë larg, dhe ajo që ndodhi në SHBA mund të shërbejë si mundësi për të riformuar shumë gjëra, për ta parë botën ndryshe, për ta parë Evropën ndryshe. Europa po bëhet më e vjetër, ka nevojë për më shumë energji, për më pak rregullime dhe ndoshta është një mundësi për të vënë në lëvizje gjërat”, tha Rama.

Ai gjithashtu theksoi se SHBA-të janë shumë më të forta sesa çdo individ që është në Shtëpinë e Bardhë, dhe se ajo që mund të ndodhë në SHBA mund të ketë një ndikim pozitiv për Europën.

LEXONI GJITHASHTU

• Trump në krye të Shtëpisë së Bardhë, reagon për herë të parë kryeministri Rama
• Osmani uron Donald Trumpin për fitoren: Mezi pres të punoj me administratën e re