Konferenca e Kryetarëve/ Miratohet vetëm me votat e PS-së nisma për të shpallur Iranin sponsor të terrorizmit, shqyrtohet sot në Kuvend

Miratohet në Konferencën e Kryetarëve, vetëm me votat e PS-së, projektrezoluta për shpalljen e Iranit shtet financues të terrorizmit, si dhe për përcaktimin e Gardës Revolucionare dhe Hezbollahut si organizata terroriste.

Dokumenti, i paralajmëruar më herët edhe nga kryeministri Edi Rama, parashikon që pas miratimit në Kuvend, qeveria shqiptare të ndërmarrë hapa të menjëhershëm për shpalljen si organizata terroriste të Hezbollahut dhe Gardës Revolucionare Islamike (Pasdaranët).

Në përmbajtjen e draftit dënohen gjithashtu sulmet kibernetike të atribuuara Iranit ndaj institucioneve shqiptare, përfshirë edhe sulmin më të fundit ndaj Kuvendit. Po ashtu, u bëhet thirrje vendeve demokratike dhe organizatave ndërkombëtare që të koordinojnë veprime kundër terrorizmit të sponsorizuar nga shtetet dhe të forcojnë bashkëpunimin në këtë drejtim.

Ndërsa shumica socialiste e konsideron këtë nismë si urgjente, opozita ka bërë të ditur se nuk do të marrë pjesë në seancë. Kreu i grupit parlamentar të Partisë Demokratike, Gazment Bardhi, e ka cilësuar mbledhjen si një proces jashtë standardeve parlamentare.

Sipas tij, bëhet fjalë për një seancë të thirrur pa një rend dite të miratuar zyrtarisht dhe në kundërshtim me procedurat e parashikuara në rregullore, duke e konsideruar atë si një nismë që lidhet me interesa politike të drejtuesve të mazhorancës.

Në vend të pjesëmarrjes në Kuvend, opozita ka zgjedhur të dalë në terren, duke u fokusuar në takime me qytetarët dhe në përgatitjet për protestën e paralajmëruar më 22 mars.

Nga ana tjetër, kryetari i grupit parlamentar të Partisë Socialiste, Taulant Balla, reagoi ndaj këtij qëndrimi, duke e kundërshtuar argumentin e opozitës. Ai theksoi se një qëndrim i qartë i Shqipërisë në krah të Shteteve të Bashkuara përballë veprimeve të Iranit nuk mund të konsiderohet si çështje personale, ndërsa shtoi se arsyet e urgjencës së rezolutës do të sqarohen në Konferencën e Kryetarëve.

Sipas njoftimit zyrtar, rendi i ditës i publikuar paraprakisht përfshin vetëm miratimin e procesverbaleve të seancave të mëparshme dhe njoftime të ndryshme. Megjithatë, pritet që përmes mbledhjes së Konferencës së Kryetarëve të përfshihet edhe projektrezoluta në agjendën e seancës plenare.