Korça nderon Llazar Fundon, busti i intelektualit vendoset në zemër të qytetit

Figura të botës akademike kanë vlerësuar aktin e vendosjes së bustit të intelektualit të shquar, Llazar Zai Fundo, në zemër të qytetit të Korçës.

Historiani dhe profesori Aurel Plasari theksoi se vendosja e bustit të Llazar Fundos në Korçë i rikthen drejtësinë historike njërit prej intelektualëve më të persekutuar të shekullit.

Historiani tha se monumenti që ka ndërtuar Korça është një borxh historik, një vlerë e shtuar kujtesës së Korçës dhe të Shqipërisë, për një viktimë që, më thjesht sesa ta quajmë e diktaturës, ishte viktimë personale e Enver Hoxhës.

Plasari zbuloi të tjera detaje historike, duke thënë se ish-diktatori Enver Hoxha, në mesazhin e tij për të vrarë Zai Fundon, pyetja e parë që kishte kërkuar t’i bëhej ishte: “Përse ka vajtur në Kosovë?”

Historiani dhe profesori Aurel Plasari nënvizoi se ky është një tregues i xhelozisë së sundimtarëve kundër intelektualëve dhe njerëzve të mendjes.

“Mendoj se monumenti që ka ndërtuar Korça është një borxh historik, një vlerë e shtuar kujtesës së Korçës dhe të Shqipërisë, për një viktimë që, më thjesht sesa ta quajmë e diktaturës, ishte viktimë personale e Enver Hoxhës. Kjo është një e vërtetë që duhet theksuar në histori, tashmë e dokumentuar, pavarësisht nga interpretimet e ndryshme që i janë dhënë krimit për ekzekutimin e tij fizik dhe torturimin e tij. Të mos harrojmë se, në mesazhin e tij për të vrarë Zai Fundon, Enver Hoxha, që s’ishte ende në pushtet dhe kishte filluar vrasjet, jepte porosi që t’i bëheshin disa pyetje, dhe e para ishte: ‘Përse ka vajtur në Kosovë?’ Kjo duhet të na bëjë të kuptojmë edhe më qartë kontekstin e ekzekutimit të një intelektuali si Llazar Fundo, si tregues i xhelozisë së sundimtarëve kundër intelektualëve dhe njerëzve të mendjes. Është mësim historik për çdo kohë, jo vetëm për kohën kur ka ndodhur tragjedia e zhdukjes së tij fizike”, tha Plasari.

Busti i Zai Fundos është vendosur në një shesh në pedonalen e qytetit të Korçës, shumë pranë shtëpisë ku Fundo u lind dhe u rrit.