“Korça rezervohet për festat e fundvitit”, operatorët turistikë: Kërkesa të larta

Të gjitha rezervimet për festat e fundvitit në Korçë janë mbyllur sipas operatorëve turistikë.

Ata raportojnë se kërkesat në sektorin e hoteleri-turizmit, që kanë nisur që prej muajit tetor, u plotësuan shpejt për shkak të interesit të lartë për juglindjen.

“Ne i kemi mbyllur gjithë rezervimet për fundvit, duke filluar nga festat e nëntorit, si dhe për Vitin e Ri e Krishtlindjet. I gjithë hoteli me kapacitet prej 35 dhomash është i rezervuar. Pjesa më e madhe janë turistë vendas, por ka edhe të huaj,” thotë Maria Vani, menaxhere.

“Datat festive po afrojnë dhe kërkesat kanë qenë të larta nga turistët vendas e nga rajoni. Rezervimet kanë nisur që prej muajit tetor dhe muaji nëntor ka pasur interes shumë të lartë. Këto data janë të ezauruara për ne, mirëpresim gjithë turistët. Pjesa më e madhe është nga tregu vendas, por nuk mungojnë as turistët e huaj,” thotë Klaus Pronjari, menaxher.

Bashkia e qytetit të Korçës ka planifikuar një kalendar festiv, me aktivitete kulturore dhe koncerte të ndryshme në pedonale, Pazarin e Vjetër, si dhe në fshatrat turistike të Voskopojës, Dardhës dhe Boboshticës.