Korçë, 200 fëmijë vuajnë mungesën e trajtimit nga mjeku legopedë

Në shërbimin spitalor dhe qendrat shëndetësore të qarkut të Korçës mungojnë mjekët logopedë. Një gjë e tillë ka sjellë vështirësi të shumta për familjarët e fëmijëve të cilët kanë vështirësi me të folurin.

Alesia Filipi është mjekja e vetme e liçensuar në fushën e logopedisë dhe punon në shkolla speciale e qytetit të Korçës. Ajo thotë se kjo kategori fëmijësh kanë nevoja specifike, ndaj sipas saj mjek logopedë duhet të ketë me patjetër spitali i Korçës.

“Patjeter që duhet të ketë, siç funksionon në gjithë sistemin Europian, duhet të ketë logopedistë, të ketë një ekip multidisciplinar që lehtëson punën edhe të prindërve për të marrë një shërbim sa më të afërt drejt qendrës shëndetësore.

Nuk kemi për momentin, nuk ka as në qendrat spitalore, për momentin nuk ka. I vetmi institucion është qendra komunitare për fëmijët me aftësi të kufizuar dhe përfitojnë fëmijët të cilët kanë IKMCAP.”

Kristi Ndini është nëna e një fëmije me probleme të aparatit folës. Ajo thekson se mungesa e mjekëve logopedë është kosto e shtuar për të dhe prindërit e tjerë.

“Vështirësi e madhe. Kemi hasur vështirësi sepse fëmija im nëse do të kishte mjek te tille do kishte ecur me shume, po e sot që është vënë, ndiejmë vështirësi sepse një person i vetëm nuk mund të bëjë gjithçka për fëmijët.

Vështirësia është e madhe, fëmija nuk merr punën e duhur. Kosto patjetër, vijmë e çojmë, me taksi, djali ka probleme me të ecurën, do vish me makinë, është kosto. Shumë e vështirë, për ne prindërit që i jemi përditë në shtëpi, mungojnë shumë shërbime nuk është vetëm një “

Burime zyrtare bëjnë të ditur se vetëm në qytetin e Korçës, 200 fëmijë kanë nevojë për shërbimin e mjekëve logopedë. Problemet me të folurin e fëmijëve vijnë si pasojë e përdorimit të tepërt të teknologjisë dhe mungesës së interaktiviteti me fëmijë të tjerë, apo edhe qoftë me prindërit.

LEXONI GJITHASHTU: 

• Champions| Barcelona shkëlqen në Paris, Atletiko ia del në shtëpi ndaj Dortmund
• Rikthimi i Berishës në grup parlamentar, Alibeaj: Asnjë non grata pjesë e PD