Korrupsioni i policëve, Balla: Çdo denoncim do të marrë vëmendje maksimale

Ministri i Brendshëm, Taulant Balla u shpreh se çdo denoncim i qytetarëve që vjen si raportim i korrupsionit të Policisë së Shtetit do të ketë vëmendje maksimale dhe do t’i jepet zgjidhje.

Sipas tij veshi i shurdhër dhe syri qorr i një polici dhe mosreagimi i forcave të rendit ndaj denoncimeve të qytetarëve, janë rreshtim i policisë kundër tyre dhe kundër shtetit.

“Të dashur qytetarë, nga çdo anë e Shqipërisë. Ju jeni jo vetem arsyeja pse ekziston Policia e Shtetit, por jeni edhe partnerët tanë të pazëvendësueshëm në mbrojtjen e vendit dhe të çdo individi, nga çdo lloj paligjshmërie, që nga korrupsioni dhe krimi i organizuar, tek krimi ordiner dhe deri tek krimi ndaj pronës publike e private. Veshi i shurdhër dhe syri qorr i një polici, heshtja bashkëfajtore me të fortët e lagjes dhe mosreagimi i forcave të rendit ndaj denoncimeve të qytetarëve, janë rreshtim i policisë kundër tyre, kundër shtetit. Prandaj çdo ankesë e juaja çdo denoncim, po ndiqet me shumë kujdes, sepse për mua secila prej tyre është një gur në murin e madh të besimit që duhet të ringrihet për Policinë e Shtetit,” – u shpreh Balla.

Ministri falënderoi përmes nje postimi në rrjetet sociale të gjithë qytetarët që kanë raportuar ankesa për veprime të dyshuara të paligjshme apo që bien ndesh me Kodin Etik në Policinë e Shtetit.

LEXONI GJITHASHTU:

• “Godite policinë, godite shtetin”, Balla: Masa më të ashpra se në Kodin Penal
• Polici i plagosur pas ndërhyrjes në sherr, Balla: Kushdo guxon, do ndëshkohet rëndë