Kosova dënon deklaratat e Serbisë për marrëveshjen ushtarake Zagreb-Prishtinë-Tiranë

Ministria e Punëve të Jashtme dhe Diasporës e Republikës së Kosovës ka dënuar ashpër deklaratat e fundit të Serbisë lidhur me Memorandumin Trepalësh të Bashkëpunimit Ushtarak, të nënshkruar mes Kosovës, Kroacisë dhe Shqipërisë.

Në një reagim zyrtar, MPJD e cilëson qëndrimin e Beogradit si agresiv dhe kërcënues, duke e akuzuar Serbinë për shkelje të hapur të Marrëveshjes së Brukselit. Sipas ministrisë, Serbia pretendon se i pranon këto marrëveshje, por refuzon me qëllim t’i nënshkruajë, duke dëshmuar mungesën e vullnetit për një dialog konstruktiv.

“Me këto deklarata, Serbia minon angazhimet e saj për ndërtimin e marrëdhënieve të mira fqinjësore dhe sfidon institucionet legjitime të Republikës së Kosovës,” thuhet në reagimin e MPJD-së. Ministria thekson se Serbia nuk ka të drejtë të pengojë marrëdhëniet ndërkombëtare të Kosovës apo të pretendojë të flasë në emër të saj.

MPJD gjithashtu i cilëson përpjekjet e Serbisë për t’u paraqitur si garantuese e paqes në Ballkan si absurde, duke theksuar se asnjë shtet në rajon nuk ka kontribuar më shumë në destabilizimin e Ballkanit Perëndimor se Serbia.

“Në vend që të lëshojë deklarata agresive dhe mashtruese, Serbia duhet të fokusohet në respektimin e marrëveshjeve ndërkombëtare dhe të heqë dorë nga ambiciet hegjemoniste,” thekson ministria, duke i bërë thirrje Serbisë që të ndërmarrë hapa konkretë drejt njohjes së pavarësisë dhe sovranitetit të Kosovës.

MPJD gjithashtu kërkon nga Serbia të hapë arkivat e saj të klasifikuara të kohës së luftës, në mënyrë që krimet e kryera të përballen me drejtësinë.

Në përfundim, Ministria e Punëve të Jashtme dhe Diasporës riafirmon angazhimin e Kosovës për forcimin e sigurisë dhe partneriteteve ndërkombëtare, duke theksuar se vendi nuk do të frikësohet nga kërcënimet serbe.

LEXONI GJITHASHTU:

• Kurti reagon për aleancën ushtarake Kosovë, Shqipëri dhe Kroaci
• Aleanca me Shqipërinë e Kosovën, Kroacia-Serbisë: Ka ikur koha kur pyetej Beogradi