Aleanca me Shqipërinë e Kosovën, Kroacia-Serbisë: Ka ikur koha kur pyetej Beogradi

Pas nënshkrimit të Deklaratës së Bashkëpunimit Trepalësh Ushtarak mes Kroacisë, Shqipërisë dhe Kosovës, Beogradi ka reaguar ashpër, duke kërkuar shpjegime nga Zagrebi dhe Tirana. Në përgjigje të këtij qëndrimi, Ministri kroat i Mbrojtjes, Ivan Anusiç, deklaroi se Kroacia nuk ka më nevojë për miratimin e Serbisë në vendimmarrjet e saj.

“Ka kaluar koha kur Kroacia e pyeste Beogradin se çfarë i lejohej të bënte dhe si duhej ta bënte, dhe kjo nuk do të ndodhë më kurrë,” shkroi Anusiç në platformën sociale “X”.

Ai theksoi se Kroacia është një shtet i pavarur prej 35 vitesh dhe se do të nënshkruajë marrëveshje me këdo që dëshiron.

Deklarata e tij erdhi si kundërpërgjigje ndaj Ministrisë së Jashtme të Serbisë, e cila njoftoi se do të kërkojë një shpjegim zyrtar nga Kroacia dhe Shqipëria për këtë marrëveshje, duke e cilësuar atë si një kërcënim për stabilitetin në rajon.

Ndërkohë, Kosova e ka cilësuar marrëveshjen trepalëshe si një hap të rëndësishëm për sigurinë dhe paqen në Ballkan, ndërsa Beogradi e ka konsideruar atë një zhvillim shqetësues që është bërë pa konsultim me Serbinë.

Reagimet nga palët tregojnë se marrëveshja e re ushtarake mes Kroacisë, Shqipërisë dhe Kosovës ka nxitur debate të forta në rajon, duke reflektuar tensionet e vazhdueshme mbi çështjet e sigurisë dhe politikës së jashtme në Ballkan.

LEXONI GJITHASHTU:

• Kurti reagon për aleancën ushtarake Kosovë, Shqipëri dhe Kroaci
• Kryeministri i Kosovës, Kurti shpreh ngushëllime për viktimat në Maqedoninë e Veriut