Kosova jep 254 mijë euro për financimin e teksteve shkollore në Luginën e Preshevës

Qeveria e Kosovës ka ndarë 254.562 euro për tekstet shkollore në gjuhën shqipe për fëmijët shqiptarë që jetojnë në tri komunat në Luginën e Preshevës.

Lajmi u bë pblik nga kryeministri Albin Kurti i cili tha këtë të mërkurë, se ashtu sikurse vitin e kaluar edhe këtë vit, qeveria në Prishtinë do të financojë ndarjen e teksteve shkollore për fëmijët shqiptarë në Preshevë, Bujanovc dhe Medvegjë.

“Vitin e kaluar kemi ndarë mjete financiare me qëllim të pajisjes me tekste mësimore në gjuhën shqipe për nxënësit shqiptarë të shkollave fillore në Preshevë, Medvegjë dhe Bujanoc. Ndihma jonë për bashkëkombësit tanë është jo vetëm nevojë, por edhe obligim i yni që të mbrojmë të drejtat e tyre elementare”, tha ai.

Kërkesa për ndarjen e këtyre mjeteve është bërë nga Këshilli Kombëtar Shqiptar. Ky këshill edhe më herët ka kërkuar që komuniteti shqiptar në Serbi të ketë të drejta të njëjta që gëzon komuniteti serb në Kosovë, shkruan rel.

Në mesin e këtyre të drejtave është përmendur edhe sigurimi i teksteve shkollore në gjuhën shqipe, duke argumentuar se komunitetit serb në Kosovë i lejohet përdorimi i materialeve mësimore nga Republika e Serbisë.

Përfaqësuesit e Preshevës, Medvegjës dhe Bujanocit – komuna që njihen edhe me termin Lugina e Preshevës – shpesh janë ankuar se diskriminohen nga autoritetet në Serbi.

Sipas regjistrimit të fundit të popullsisë, shqiptarët janë pakica e katërt më e madhe në Serbi, përkatësisht në këtë shtet jetojnë 61.687 shqiptarë.