Qeveria e Kosovës ka miratuar ndarjen e bonusit prej100 euro për fëmijët nën moshën 16 vjeç dhe pensionistët, një masë që do të ekzekutohet gjatë ditës së premte, paralelisht me pagat në sektorin publik. Lajmi u bë i ditur nga Ministri i Financave, Punës dhe Transfereve, Hekuran Murati, në një konferencë për media pas mbledhjes së qeverisë.

Murati sqaroi se përfitimi nga kjo shtesë është i kushtëzuar nga disa kritere specifike. “I vetmi kusht është që individët nuk mund të përfitojnë nga më shumë se një skemë; ata mund të marrin shtesën vetëm një herë. Po ashtu, të ardhurat nga skemat shtetërore nuk duhet të kalojnë 700 euro në muaj, për të siguruar që ndihma të shkojë vetëm për ata që kanë më shumë nevojë,” tha ai.

Ministri gjithashtu njoftoi se deri tani vetëm 60 persona kanë aplikuar për të hequr dorë nga përfitimi i shtesës për fëmijët.

Kjo masë synon të ofrojë mbështetje financiare për grupet më të cenueshme në shoqëri dhe të ndihmojë ata për të përballuar sfidat ekonomike.

LEXONI GJITHASHTU:

• Aktakuzë kundër një serbi për kryerje të dhunës seksuale gjatë luftës në Kosovë
• Kurti këmbëngul: Do t’i përgjigjem Prokurorisë Speciale nëse vjen në Kryeministri