Krasniqi: U cenua sovraniteti, PDK mbështetje të plotë institucioneve të Kosovës

Kryetari i Partisë Demokratike të Kosovës (PDK), Memli Krasniqi, është takuar sot pasdite me presidenten e Kosovës, Vjosa Osmani dhe drejtorin e Agjencisë së Kosovës për Inteligjencë (AKI), Petrit Ajeti.

Pas takimit, Krasniqi theksoi se ka ofruar mbështetjen e plotë të gjitha institucioneve të sigurisë, dhe shtoi se për PDK-në interesi nacional është mbi të gjitha.

Krasniqi i bëri thirrje aleatëve ndërkombëtar që të rrisin presionin kundër Serbisë për dorëzimin e terroristëve.

“Për mua dhe PDK-në, është krejtësisht e qartë se organizimi dhe orkestrimi i sulmit terrorist mbi Republikën e Kosovës adresën kryesore e ka në Beograd. Konfirmimi i përfshirjes së Milan Radojçiç në këtë aksion, armatimi i sofistikuar dhe i shumtë i terroristëve, strehimi i tyre në Serbi pas sulmit dhe lartësimi i tyre si heronj nga institucionet zyrtare të Beogradit, përfshirë shpalljen e ditës së sotme si ditë zie për ta – tregojnë për lidhjen e fortë të këtij grupi terrorist me shtetin e Serbisë.

Prandaj, në periudha sfiduese si kjo, kur është cenuar integriteti territorial, sovraniteti i shtetit tonë dhe siguria e qytetarëve tanë, për PDK-në, siç ka qenë gjithmonë, interesi nacional i vendit është dhe do të mbetet mbi të gjitha. Si PDK, i kemi ofruar mbështetjen tonë të plotë të gjitha institucioneve të sigurisë në përballje me këtë situatë.

Sot, përveç tjerash, i bëjmë thirrje edhe aleatëve tanë ndërkombëtarë që të rrisin presionin ndaj Serbisë për t’i dorëzuar tek autoritetet kosovare, terroristët të cilët Serbia i ka marrë në mbrojtje.

Veprimet e tyre nuk mund të mbeten pa u ndëshkuar dhe drejtësia duhet të triumfojë”, shkroi Krasniqi në një postim në Facebook.