Kreu i FBI-së konfirmon: Robinson la gjurmë ADN-je në armë gjatë vrasjes së Kirk

Drejtori i FBI-së, Kash Patel, tha se hetuesit kanë gjetur prova të ADN-së që lidhin vrasësin e dyshuar të Charlie Kirk, Tyler Robinson, me vendin e të shtënave të javës së kaluar.

Patel e bëri njoftimin të hënën në mëngjes gjatë një paraqitjeje në emisionin “Fox & Friends”, duke thënë se ADN-ja e të dyshuarit u gjet në një kaçavidë, si dhe në një peshqir të mbështjellë rreth armës së zjarrit që besohet të jetë përdorur në të shtëna.

“Mund të konfirmoj se gjurmët e ADN-së nga peshqiri që ishte mbështjellë rreth armës dhe ADN-ja nga kaçavida janë lidhur pozitivisht me të dyshuarin që është në paraburgim”, tha Patel.

Autoritetet thonë se Robinson kërceu nga çatia dhe iku nga kampusi i Universitetit të Luginës së Utah-ut menjëherë pas të shtënave. Ata thonë se më pas ai kaloi nëpër një brez të pyllëzuar dhe hyri në një vendbanim aty pranë, duke e lënë armën të mbështjellë me një peshqir në pyll, shkruan Fox news.

Robinson është aktualisht nën “mbikëqyrje të posaçme” në paraburgim në Utah. Policia thotë se ai nuk po bashkëpunon gjatë marrjes në pyetje.

LEXONI GJITHASHTU:

• Trump intensifikon retorikën kundër ‘të majtës radikale’ pas vrasjes së Charlie Kirk
• CNN: Valë shkarkimesh dhe kërcënimesh për postime që festojnë vrasjen e Charlie Kirk