Kreu i Shoqatës së Transportit Publik: Jemi në krizë financiare, asnjë përgjigje nga institucionet

Kreu i Shoqatës së Transportit Publik, Rixhin Qoshja u shpreh për Euronews Albania se ky sektor ndodhet në një krizë prej 2 vitesh dhe se nuk ka marrë asnjë ndihmë nga shteti.

Z. Qoshja theksoi se edhe pse kanë dërguar disa herë kërkesa pranë institucioneve, si bashkia, kryeministria, Ministria e Transportit, nuk kanë marrë një përgjigje nga ana e tyre.

“Problematikat tona nisën gjatë pandemisë. Po bën gati 2 vite që nuk kemi një përgjigje konkrete që ca bëhet me transportin publik, kush do të jetë ndihma e këtij sektori. Ne jemi në krizë prej 2 vitesh, situata është shumë problematike financiarisht. Deri më tani nuk kemi asnjë përgjigje nga institucionet përgjegjëse për sektorin e transportit publik”, u shpreh kreu i shoqatës.

Ai shtoi se transporti publik është një sektor që gjendet përballë rritjes së çmimeve.

“Ne nuk jemi sektor që rrisim çmimin, çmimin na i dikton dikush tjetër. Ne jemi sektor përballë rritjes së çmimeve si gjithë sektorët e tjerë”, tha z. Qoshja.

LEXONI GJITHASHTU:

• Transporti publik, policia zbulon shoferë pa patentë dhe të dehur në timon
• Shkodra e Vlora paralajmërojnë përgjysmim të autobusëve urbanë