Kreut të Kishës Ortodokse Serbe i vendoset kusht për vizitën në Kosovë

Ministria e Punëve të Jashtme dhe Diasporës i ka vendosur një kusht Kreut të Kishës Ortodokse Serbe patriarkut Porfirije, në mënyrë që këtij të fundit t’i mundësohet kërkesa për zhvillimin e një vizitë në Kosovë.

Përmes një njoftimi, ky institucion deklaroi se partiarkut Porfirije i është kërkuar që të dënojë apo distancohet nga “veprimet e pjesëtarëve të Kishës që po i ofrojnë përkrahje grupeve kriminale në veri të Kosovës” të cilët janë “përgjegjës për barrikadat” e ngritura në atë pjesë.

Porfirije ka bërë kërkesë më 23 dhjetor që të qëndrojë në Kosovë për tri ditë, 26-28 dhjetor.

Por, zyrtarët serbë thanë se patriarku serb u kthye mbrapsht për në Serbi të hënën, teksa tentoi të hynte në Kosovë përmes pikëaklimit kufitar të Merdares.

“Sqarim nga MPJD rreth vizitës së Patriarkut Porfirje në Republikën e Kosovës. Prishtinë, 26 dhjetor 2022. Ministria e Punëve të Jashtme dhe Diasporës e Republikës së Kosovës njofton se ditën e premte (23 dhjetor), përmes kanaleve zyrtare, ka pranuar kërkesën për lejimin e vizitës treditore (26-28 dhjetor 2022) të Patriarkut të Kishës Ortodokse Serbe (KOS), Porfirje në Republikën e Kosovës. Pas shqyrtimit të kërkesës, MPJD është përgjigjur se vizita e Porfirjes, do të mund të aprovohet vetëm pasi  Kisha Ortodokse Serbe të ketë dënuar, respektivisht të jetë distancuar nga veprimet e pjesëtarëve të KOS-it, të cilët, duke hyrë ilegalisht në Republikën e Kosovës, janë duke i dhënë përkrahje të hapur grupeve kriminale në veri të Republikës së Kosovës, të cilat janë përgjegjëse për barrikadat e vendosura atje. Pra, kërkesa për vizitë e Patriarkut Porfirije nuk është refuzuar, siç po propagandohet nga Kisha Ortodokse Serbe dhe mediat serbe, por është ndërlidhur me distancimin nga aktet e dhunës dhe veprimet e lartpërmendura.

Një qëndrim i tillë i institucioneve të Kosovës është determinuar nga fakti që prifti ortodoks Predrag Popoviq, nga Kisha e Shën Bartolomeut dhe Barnabas në Rakovicë, afër Beogradit, ditë më parë  kishte pranuar publikisht se ditën e martë të javës së kaluar kishte kaluar ilegalisht kufirin e Republikës e Kosovës dhe duke përdorur rrugët anësore –sipas tij për t’iu shmangur patrullave të KFOR-it, i kishte vizituar dhe përkrahur protestuesit në barrikadat në Leposaviq. Me qëllim të sqarimit të qëndrimit të vërtetë të Qeverisë së Republikës së Kosovës rreth kësaj çështjeje, Zyra Ndërlidhëse e Kosovës në Serbi, ka kontaktuar fillimisht përfaqësuesit e misioneve diplomatike të vendeve të Kuint-it, ku ka bërë të qartë se deklarata e KOS-it është e pavërtetë, pasi kërkesa si e tillë nuk është refuzuar, por është ndërlidhur me distancimin nga aktet e dhunës dhe deklarimin se nuk qëndron prapa veprimeve të përfaqësuesve të saj, si në rastin e priftit ortodoks Popoviq”, thuhet në njoftim.

LEXONI GJITHASHTU

• Ministri serb i Mbrojtjes: Do të rrisim numrin e forcave speciale të ushtrisë
• Kurti takon komandantin e KFOR-it: Nuk duhet të ketë barrikada në asnjë rrugë
• Diplomati gjerman reagon ndaj kryeministres serbe për Veriun