“Krim monstruoz”, Presidentja Osmani dënon vrasjen e Liridonës

Presidentja e Kosovës Vjosa Osmani, ka reaguar pas vrasjes së Liridona Ademajt. Osmani e cilësoi këtë akt si monstruoz dhe kërkoi që përgjegjësit të marrin dënimin e merituar.

“Femicidi është dëshmi rrëqethëse që shpërfaq pabarazinë e rrënjosur thellë dhe dhunën me të cilën përballen gratë. Është një rrëfim tragjik i jetëve të shkurtuara brutalisht vetëm për shkak të gjinisë. Humbja e jetëve të grave nga duart e burrave është një njollë në ndërgjegjen tonë kolektive”, tha Osmani.

Ajo theksoi se është nevojë urgjente që të forcohet zbatimi i ligjit dhe kryerësit e krimeve të tilla të llahtarshme të përballen me dënimet më të ashpra të parapara me ligj.

“Ky krim i tmerrshëm kërkon veprim të shpejtë dhe vendimtar për t`u siguruar që drejtësia të mbizotërojë dhe që autorët ta marrin dënimin, i cili pasqyron peshën e kësaj vepre makabre penale”, theksoi ajo.

E para e shtetit të Kosovës, tha se në këto momente të rënda për gjithë vendin tonë, ndajmë dhimbjen me familjen e Liridonës, e në veçanti me fëmijët e saj të cilët humbën nënën e tyre të shtrenjtë në rrethanat më monstruoze të mundshme.

Lidhur me rastin janë arrestuar tre persona, në mesin e tyre edhe bashkëshorti i saj, Naim Murseli.

Murseli dyshohet se i ka paguar 30 mijë euro për vrasjen e gruas së tij.

LEXONI GJITHASHTU:

• “Ndal femicidit, drejtësi për Liridonën”, të dielën marshim-protestë në Tiranë
• “Jemi të shokuar”, anëtari i FSK bashkëpunëtor në vrasjen e Liridonës, flet i vëllai