Krimet mjedisore në Shqipëri, mungon ndëshkimi për shkatërruesit e natyrës

Në Shqipëri, shkeljet e ligjit që mbron mjedisin shpesh nuk ndëshkohen. Ky është përfundimi i disa studimeve të prezantuara nga një grup organizatash të shoqërisë civile, të udhëhequra nga Qendra Burimore e Mjedisit, të cilat kanë analizuar çdo hallkë të sistemit, nga inspektorët e terrenit deri te gjyqtarët e Apelit.

Gjetjet tregojnë se nuk kemi të bëjmë thjesht me mangësi sporadike, por me një kulturë të përhapur mosndëshkimi dhe një sistem të paralizuar përballë shkatërrimit të mjedisit dhe natyrës.

Organizatat kanë zbuluar se mbi 90% e dëmeve në mjedis trajtohen si kundravajtje administrative, për shkak të mungesës së rregullimit ligjor që ndan pasojat e lehta nga ato të rënda.