Kritikoi luftën në Ukrainë, fituesi i Nobelit dënohet me 2 vite e gjysmë burg

Gjykata e Moskës ka dënuar me dy vjet e gjysmë burg disidentin Oleg Orlov, bashkëpresident i fondacionit “Memorial”, të cilit iu dha çmimi Nobel për Paqen në vitin 2022.

Orlov akuzohet se ka denoncuar vazhdimisht agresionin e Rusisë në Ukrainë, ndryshe nga sa e quan Kremlini, një “operacion special ushtarak”.

Duke e shpallur fajtor, gjykata ka caktuar se aktivisti do ta shlyejë dënimin në një koloni penale me regjim të përgjithshëm.

Sipas trupës gjykuese, luftëtari veteran për të drejtat e njeriut ka “diskredituar vazhdimisht” forcat e armatosura ruse.

Salla e gjyqit ishte mbushur me mbështetës të tij që e inkurajonin, si dhe ambasadorë të huaj e gazetarë.

Vetë Oleg Orlov u shfaq i qetë teksa dëgjonte leximin e vendimit, pas të cilit u prangos dhe u shoqërua jashtë sallës nga agjentët e policisë.

Procesi gjyqësor ishte një rigjykim, pasi në tetor të vitit të kaluar gjykata kishte dhënë gjithashtu një vendim, por dënimi i atëhershëm ishte konsideruar i butë.

Oleg Orlov mori një gjobë prej 1.600 eurosh dhe u la i lirë. Por prokurorët e apeluan vendimin dhe një rigjykim u urdhërua.

Lëvizja ishte një sinjal se në Rusi autoritetet po bëhen gjithnjë e më pak tolerante ndaj kritikëve. 

LEXONI GJITHASHTU:

• 9 euro bileta ndaj Suedisë, 1500 copë në dispozicion të tifozërisë kuqezi
• 2 vite nga lufta në Ukrainë, Bardhi: Paqja dhe demokracia sulmohen nga autokratë