9 euro bileta ndaj Suedisë, 1500 copë në dispozicion të tifozërisë kuqezi

Nga kjo e martë të gjithë tifozët shqiptare të cilët duan të ndjekin nga afër kuqezinjtë në Stockholm, mund të blejnë biletën online. FSHF ka bërë të ditur nëpërmjet një njoftimi që biletat për ndeshjen e 25 marsit ndaj Suedisë kanë dalë në shitje, ndërsa 1500 copë janë në dispozicion. Çmimi për një prej tyre është i ulët, konkretisht 9 euro, ndërsa pritet që ato të shiten në një kohë të shkurtër, pjesa më e madhe nga shqiptarët që jetojnë në Suedi e jo vetëm.

Mënyra e blerjes do të jetë e njëjtë si ajo përgjatë kualifikueseve të evropianit, online nëpërmjet linkut të postuar në artikullin e FSHF. Në një vëzhgim të shpejtë, seksioni 117 është në dispozicion të tifozëve miq, me Suedinë që është skuadra pritëse. Kujtojmë se krahas Suedisë, Shqipëria ka zyrtarizuar dhe 2 miqësore të tjera, me Kilin dhe Lihtenshtejnin. Njëra prej tyre luhet më 22 mars në Itali, ndërsa ajo me skuadrën nga kontinenti i vjetër më 3 qershor në Austri.

Kuqezinjtë presin dhe një kundërshtar të fundit, me të cilin pritet të ndeshen në muajin qershor, për tu bërë gati për kampionatin evropian duke nisur nga 14 qershori. Shqipëria e nis zyrtarisht rrugëtimin më 15 qershor me Italinë, 19 qershor me Kroacinë dhe 24 me Spanjën.

LEXONI GJITHASHTU:

• Silvinjo tur vëzhgimesh e takimesh me futbollistët shqiptarë në Itali dhe Gjermani
• Nga Silvinjo te Euro 2024, presidenti Duka “zbërthen” të ardhmen e Kombëtares