Kriza globale, Zelensky tregon kërkesën që kanë bërë aleatët ndaj Kievit

Presidenti i Ukrainës, Volodymyr Zelensky, ka deklaruar se disa aleatë të Kievit i kanë kërkuar vendit të zvogëlojë sulmet ndaj objekteve energjetike të Rusisë, në një kohë kur çmimet globale të naftës janë në rritje.

Në një mesazh zanor drejtuar gazetarëve, Zelensky tha se këto sinjale kanë ardhur pas përshkallëzimit të krizës globale energjetike, por nuk specifikoi se cilat shtete qëndrojnë pas kërkesës.

“Ne kemi marrë sinjale nga disa partnerë për të reduktuar përgjigjet tona që synojnë sektorin e naftës dhe energjisë të Federatës Ruse,” u shpreh ai.

Megjithatë, lideri ukrainas la të kuptohet se Kievi nuk ka gjasa të ndryshojë kursin e tij, duke theksuar se çdo veprim do të varet nga sjellja e Rusisë.

“Nëse Rusia ndalon sulmet ndaj sektorit tonë energjetik, ne nuk do të hakmerremi ndaj sektorit të saj,” deklaroi Zelensky, duke shtuar se Ukraina mbetet e gatshme për një armëpushim.

Prej muajsh, Rusia ka zhvilluar sulme të gjera ndaj infrastrukturës energjetike ukrainase, duke lënë miliona qytetarë pa energji dhe ngrohje, veçanërisht gjatë dimrit të ashpër.

Në përgjigje, Ukraina ka intensifikuar goditjet ndaj infrastrukturës energjetike ruse, përfshirë rafineritë dhe terminalet e eksportit, me synimin për të kufizuar përfitimet e Moskës nga rritja e çmimeve të naftës.