Kryebashkiaku i Gjirokastrës: Largimi i të rinjve, problem jo vetëm në Shqipëri

Kryebashkiaku i Gjirokastrës, Flamur Golemi e konsideron largimin e të rinjve, një fenomen që nuk ndodh vetëm në Shqipëri, por edhe në vendet e rajonit.

Në emisionin “RiNon” në Euronews Albania, Golemi u shpreh se lëvizja e njerëzve është diçka normale në sistemin që ndodhemi sot.

Sipas tij, nga Gjirokastra nuk ka vetëm ikje të të rinjve.

“Sigurisht që edhe Gjirokastra është prekur nga lëvizja e popullsisë, si çdo rreth tjetër i Shqipërisë. Ky është një fenomen që nuk ndodh vetëm në Shqipëri, ke edhe në shtetet fqinje, Greqia, Italia si dhe vende të tjera rreth Shqipërisë, patjetër që njerëzit lëvizin.

Nuk është pozitive, nuk po them që largimi i të rinjve nga Gjirokastra është diçka e mirë, por është një lëvizje normale në një sistem të lirë që kemi zgjedhur të jetojmë. Ashtu sikurse ka të rinj që janë larguar nga Gjirokastra, ka shumë të rinj që afrohen në qytetin tonë”, theksoi ai.