Kryebashkiaku i Rrogozhinës ankimon dënimin me 1 vit burg për korrupsion zgjedhor

Kryebashkiaku i Rrogozhinës, Edison Memolla, ka ankimuar këtë të shtunë vendimin e Gjykatës së Posaçme, e cila e ka dënuar me 1 vit burg për korrupsion zgjedhor.

Ankimimi është dorëzuar përmes avokatit të tij në Gjykatën e Posaçme të Apelit të GJKKO-së, përmes postës elektronike.

Më 24 janar 2024, Gjykata e shpalli fajtor Memollën, pas hetimeve që nisën për shkak të një audio-përgjimi të publikuar në media. Në regjistrimin e dëgjuar nga SPAK, Memolla, në atë kohë kandidat për kryetar bashkie në Rrogozhinë, dyshohet se ka ndikuar tek një punonjës i OSHEE-së që të mos ndërpriste energjinë elektrike për një abonent debitor.

Prokurori Edvin Kondili gjatë seancave gjyqësore theksoi se qëllimi i këtij veprimi ishte që qytetari të votonte në favor të Memollës në zgjedhjet e pjesshme lokale të 6 marsit 2022.

Përveç dënimit me 1 vit burg, Gjykata e Shkallës së parë ka vendosur edhe një dënimin plotësues që për 5 vitet e ardhshme Memolla të mos ushtrojë asnjë funksion publik.

Tashmë, në Gjykatën e Apelit të GJKKO-së pritet të caktohet data e shqyrtimit të ankimit. Nëse vendimi i shkallës së parë do të mbetet në fuqi dhe do të marrë formë të prerë, Memolla do të jetë i detyruar të lërë postin e kryebashkiakut.

LEXONI GJITHASHTU:

• GJKKO e dënoi me 1 vit burg për korrupsion në zgjedhje, Memolla: Nuk e lë postin
• GJKKO vendos 1 vit burg për kryebashkiakun e Rrogozhinës, Edison Memolla