Kryeministri grek Mitsotakis uron kryepeshkopin Joan Pelushi

Kryeministri grek Kyriakos Mitsotakis ka telefonuar Kryepeshkopin Joan Pelushi, pas zgjedhjes së tij në krye të Kishës Ortodokse të Shqipërisë.

Në një postim që ka bërë në rrjetet sociale, Mitsotakis shkruan se Kisha e Shqipërisë është një pikë uniteti dhe mirëkuptimi reciprok mes dy popujve.

“Ne do të vazhdojmë të punojmë drejt këtij qëllimi, duke nderuar kujtimin dhe veprën e të bekuarit Anastas. Kam kontaktuar Fortlumturinë e Tij Kryepeshkopin e Tiranës, Durrësit dhe Gjithë Shqipërisë Ioannis dhe e përgëzova për zgjedhjen. Besimi ynë i përbashkët është se Kisha e Shqipërisë është një pikë uniteti dhe mirëkuptimi reciprok mes dy popujve. Ne do të vazhdojmë të punojmë drejt këtij qëllimi, duke nderuar kujtimin dhe veprën e të bekuarit Anastas”, shkruan Mitsotakis.

Zgjedhja e Kryepeshkopit Joan u bë më 16 mars nga Sinodi i Shenjtë i Kishës Ortodokse, pas Liturgjisë Hyjnore të së dielës.

Imzot Joani, që më parë ka shërbyer si Mitropolit i Korçës, do të pasojë Kryepeshkopin Anastas Janullatos, i cili u nda nga jeta më 25 janar të këtij viti.

Kryepeshkopi Anastas, që shërbeu për tre dekada në vendin tonë, e kishte lënë në testament se në krye të Kishës duhet të vendoset një klerik shqiptar.

LEXONI GJITHASHTU:

• Kisha Ortodokse e Shqipërisë zgjedh Joan Pelushin kryepeshkop të ri
• Patriarku Bartolomeu uron Kryepeshkopin Joan: Shërbim të gjatë e të shkëlqyer