“Kryeministri i Serbisë ‘koka’ e klanit Novi Sad!” Eksperti: Rrezik për Ballkanin

Eksperti i sigurisë Bedri Elezi ishte këtë të mërkurë i ftuar në Euronews Albania për të folur për Milos Vucevic, i cili është zgjedhur nga presidenti i Serbisë si kryeministër i vendit.

Elezi tha se ky lajm sjell rrezik për sigurinë e Kosovës por edhe për Ballkanin, pasi Vuçeviç është “koka” e grupit kriminal, të njohur si klani i Novi Sad.

Sipas Elezit në të njëjtin grup kriminal është i përfshirë edhe vëllai i presidentit Aleksandër Vuçiç, e madje edhe vetë presidenti.

“Është një alarm shumë serioz i sigurisë së Kosovës dhe në përgjithësi Ballkanit, ardhja në krye të qeverisë serbe e udhëheqësit të klanit të Novi Sad-it. Ky klan dihet se kontrollon dhe organizon jetën kriminale në gjithë territorin e Serbisë e gjithashtu në Ballkan.

Klani i Novi Sad-it është një grup i cili merret me posedim dhe shpërndarje të lëndëve narkotike, me kazino, prostitucion dhe njëkohësisht dyshohet se ky klan merret edhe me ekzekutimin e personave të caktuar që mund të pengojnë institucioneve të qeverisjes.

Në këtë grup bën pjesë edhe vëllai i presidentit, madje dyshohet se edhe vetë presidenti i Serbisë është pjesë e këtij klani, por nga fundi i 2020 klani i NoviSad-it udhëhiqet nga kandidati për kryeministër Milos Vuçeviç”,-tha Bedri Elezi.