Kryeministri i Spanjës në vështirësi, zyrtari i tij akuzohet për ngacmim seksual

Drejtësia spanjolle ka nisur një hetim ndaj një zyrtari lokal të Partisë Socialiste, PSOE, ku akuzohet për ngacmim seksual, një çështje që vë në pozitë të vështirë kryeministrin Pedro Sanchez, i cili paraqitet si mbrojtës i ashpër i luftës kundër krimeve seksuale.

Hetimi paraprak, i kryer nga prokuroria e Malagës, synon Antonio Navarro-n, sekretarin e përgjithshëm të PSOE-së në provincën Torremolinos.

Navarro akuzohet se që nga viti 2021 ka dërguar qindra mesazhe “me përmbajtje seksuale, me nënkuptime dhe propozime të paprovokuara” ndaj paditëses, e cila është gjithashtu anëtare e partisë në pushtet.

Dega lokale e PSOE-së ka kërkuar pezullimin e anëtarësisë së Navarro-s, i cili dyshohet gjithashtu se ka bërë gjeste të papërshtatshme ndaj paditëses, sipas gazetës El País.

Kjo çështje e re i shtohet rastit të Francisco Salazar-it, ish-këshilltar në zyrën e Sanchez-it, i cili gjithashtu akuzohet për ngacmim seksual nga disa ish-bashkëpunëtore. Ish-deputeti u detyrua të japë dorëheqjen në korrik.

Çështja, e cila deri tani nuk ka marrë trajtim gjyqësor, është rikthyer në qendër të vëmendjes pas deklaratave të grave që e akuzojnë Salazar-in, të cilat thanë në media se zyra e kryeministrit nuk reagoi kur ato njoftuan për herë të parë për sjelljet e tij.

Sanchez ka bërë luftën kundër dhunës ndaj grave dhe mbrojtjen e barazisë një prioritet të qeverisë së tij. Në vitin 2022 ai miratoi edhe një ligj të rëndësishëm mbi përkufizimin e “pëlqimit”.

Në muajt e fundit, çështjet gjyqësore po shtohen rreth kryeministrit, i cili thotë se ato janë sulme të së djathtës dhe të ekstremit të djathtë të opozitës.

LEXONI GJITHASHTU:

• Protestë në Madrid, thirrje për dorëheqjen e Sanchez dhe zgjedhje të parakohshme
• Sanchez: Paqja nuk do të thotë pandëshkueshmëri për “gjenocidin” izraelit në Gaza