Kryeministri Rama: Ka një sulm të organizuar për të dëmtuar turizmin shqiptar

Kryeministri Edi Rama është shprehur se ka një sulm të organizuar për të dëmtuar turizmin shqiptar.

Komentet Rama i bëri gjatë fjalës së tij në një takim të zhvilluar me kryebashkiakët e vendit, ku në fokus të diskutimit ishin turizmi dhe legalizimet.

Rama tha se janë me qindra profile fallco në rrjetet sociale që përdoren për të dëmtuar turizmin shqiptar, duke thënë se ka pësuar rënie, në një kohë që sipas tij, shifrat tregojnë të kundërtën.

“Tendenca e flukseve turistike, për të shkuar përtej detit dhe për të shkuar edhe në zona e pika që deri dje nuk mund të imagjinohej të kishte turistë. Të jeni të gjithë të vetëdijshëm që ka një sulm të organizuar për të dëmtuar turizmin shqiptar. Kam folur me kryetarët e bashkive bregdetare.

Të gjithë janë të skandalizuar nga video, lajme, komente të rreme, të manipuluara e të bëra me qëllim, që duan të thonë se këtu nuk ka ardhur njeri. Natyrisht që faktet janë në terren dhe nuk është ky preokupimi kryesor që të merremi me ata që janë pjesë e këtij sulmi të organizuar që vjen nga disa anë. Sistemet tona të sigurisë kibernetike kanë ndezur dritën e kuqe për këtë. Shumë profile fallco që përdoren për këtë sulm.

Por kjo është njëra anë e medaljes që vlen për të kuptuar se ajo që vjet ishte një çelje e lules së turizmit shqiptar në sytë e botës, erdhi edhe me sfida të reja, që janë gjithmonë e më komplekse që kanë të bëjnë me gjithë elementët. Komisioni Europian nxori një vlerësim dhe Shqipëria është në vendin e parë me 86 % rritje të turizmit”, tha Rama.

LEXONI GJITHASHTU:

• Sezoni turistik| Rama mbledh kryebashkiakët, pritet të marrin pjesë edhe ata të PD
• Xhafo: SMS-ja sekrete që Rama i ka çuar Dumanit, cila është dosja