Kthimi i mbetjeve të rrezikshme, ish-deputeti: Nuk kemi ende deklaratë doganore

Rreth 2100 tonelata mbetjesh industriale pritet të mbërrijnë në Shqipëri mbrëmjen e së hënës.

Ish-deputeti Igli Cara ka komentuar situatën e këtij importi të mbetjeve të rrezikshme gjatë emisionit “Barometri” në Euronews Albania.

Mbetjet dyshohet se përmbajnë lëndë të dëmshme helmuese, të paketuara në 102 kontejnerë, sipas informacionit nga organizata joqeveritare amerikane Rrjeti i Aksionit të Bazelit.

Cara theksoi se ende nuk kemi një deklaratë doganore nga qeveria, e cila sipas tij duhet të sqarojë kush e organizoi këtë import.

“Qeveria, në fillim, duhet të thotë kush e bëri. A ka dalë një deklaratë doganore? Sot, në këtë moment, nuk kemi një deklaratë doganore. Të gjithë e dinë se ekziston një sistem në Doganë që siguron këto deklarata. Ne nuk dimë kush ishte eksportuesi; sot e kësaj dite nuk dimë çfarë është deklaruar. Nuk dimë emrin e mbetjeve. Sot, qeveria nuk ka një deklaratë dhe tregon një mostransparencë të theksuar të ngjarjes,” tha ai.

Ky situatë ka ngjallur shqetësim tek qytetarët dhe ekspertët, të cilët kërkojnë transparencë dhe veprime të menjëhershme nga autoritetet për të siguruar shëndetin dhe sigurinë e publikut.