Kuba dënon qëndrimin e SHBA-së ndaj Venezuelës, teksa tensionet rriten

Kuba ka akuzuar Shtetet e Bashkuara se po shtyjnë përpara largimin e dhunshëm të udhëheqjes së Venezuelës, duke paralajmëruar se vendosja në rritje e forcave ushtarake amerikane në Karaibe përfaqëson një kërcënim “të ekzagjeruar dhe agresiv” për stabilitetin rajonal.

“U bëjmë thirrje popullit të Shteteve të Bashkuara që ta ndalojnë këtë çmenduri”, tha Ministri i Jashtëm i Kubës, Bruno Rodriguez, në një deklaratë të martën.

Ai paralajmëroi se “qeveria amerikane mund të shkaktojë një numër të pallogaritshëm vdekjesh dhe të krijojë një skenar dhune dhe paqëndrueshmërie në hemisferë që do të ishte i paimagjinueshëm”, duke shtuar se veprime të tilla do të shkelnin ligjin ndërkombëtar, si dhe kartën e Kombeve të Bashkuara.

Dënimi vjen ndërsa Presidenti i SHBA-së, Donald Trump, po shqyrton veprime shtesë kundër Presidentit të Venezuelës, Nicolas Maduro, me Shtëpinë e Bardhë që refuzon të përjashtojë masa më të dhunshme.

Administrata Trump e ka akuzuar vazhdimisht Maduron për udhëheqjen e një fushate për të kontrabanduar drogë në SHBA, edhe pse nuk ka ofruar asnjë provë për të mbështetur pretendimin e saj.

Gjatë dy muajve të fundit, SHBA-të kanë sulmuar 21 anije në Detin e Karaibeve dhe Oqeanin Paqësor, duke vrarë të paktën 83 persona. SHBA-t pretenduan se këto anije ishin të përfshira në trafikun e drogës, por autoritetet nuk kanë publikuar asnjë provë që tregon se aty ishin të pranishme narkotikë, dhe studiuesit ligjorë argumentojnë se edhe nëse do të gjendej drogë, sulmet ka të ngjarë të shkelnin të drejtën ndërkombëtare.

Vendosja ushtarake amerikane në rajon është më e madhja që ka qenë në dekada, me rreth 15,000 personel amerikan të stacionuar në të gjithë Karaibet.

Ndërkohë, Trump ka këmbëngulur vazhdimisht se nuk po kërkon të rrëzojë qeverinë e Venezuelës.

LEXONI GJITHASHTU:

• Venezuela u kërkon linjave ajrore ndërkombëtare të rifillojnë fluturimet
• Putin “tregon” vijat e kuqe për Ukrainën, dërgon shërbimet sekrete për negociata