Kujtesa e qytetit përmes artit dramtik, hapet ekspozitë për teatrin e Elbasanit

“Kujtesa e qytetit përmes artit dramatik” titullohet eskpozita e çelur në Bibliotekën “Qemal Baholli”. Studiuesi Fetah Biza sjell për publikun një homazh për historinë teatrore të Elbasanit nga viti 1917 deri në 1944.

 “Kemi hapur një ekspozitë për jetën kulturore të qytetit të Elbasanit, të cilën e kemi mbledhur në vitet 1917–1944. Kuptohet që është një periudhë shumë e largët; duke e marrë nga literatura e bibliotekës, kemi shfletuar të gjithë gazetat e saj. Do të mbetet si gur themeli për historikun e teatrit të Elbasanit.”- shprehet Fetah Biza, studiues.

Ekspozita nderon figurat që i dhanë jetë skenës me 64 premiera teatrore, të realizuara nga regjisorë, dramaturgë dhe mësues të pasionuar.

 “Kjo iniciativë ka të bëjë me jetën e babait tim, i cili edhe ai gjatë asaj periudhe ka punuar si aktor, ka mbajtur arkivën e teatrit ‘Skampa’, e ka rregulluar dhe e ka çuar deri në njëfarë stadi, dhe më pas ajo pati prishjet e veta. Unë do të mundohem që arkivën e Elbasanit, arkivën e teatrit ‘Skampa’, ta ndaj në tre periudha: pas vitit 1944 (periudha e rilindjes), periudha e realizmit deri në 1962, dhe nga 1962 deri sot, që është periudha e teatrit profesionist.” -shprehet Fetah Biza, studiues

Ekspozita vjen si një homazh për teatrin e Elbasanit dhe një kontribut në ruajtjen e kujtesës kulturore të qytetit.